Mas mataas sana ang naging paglago ng ekonomiya ng Pilipinas noong 2025 kung hindi napilitang ihinto ng pamahalaan ang paggastos sa imprastruktura dahil sa kontrobersiya sa flood control projects, ayon sa Department of Economy, Planning and Development.
Bumagal ang paglago ng gross domestic product sa 3% noong ikaapat na kwarter ng 2025 dahil sa matinding pagbaba ng public construction na nagbawas ng mahigit isang porsiyentong puntos sa kabuuang economic growth.
Ayon sa pagtataya, kung nanatiling matatag ang public construction, umabot sana sa 5.5% ang GDP growth ng bansa sa halip na 4.4%.
Batay sa datos ng Philippine Statistics Authority, lumiit ng 7.1% ang construction sector sa huling bahagi ng 2025, na nag-ambag sa ikatlong sunod na taon ng pagkabigo ng ekonomiya na maabot ang target growth ng administrasyon.
