Handa ang G7 nations na gumawa ng hakbang upang suportahan ang pandaigdigang suplay ng enerhiya matapos tumaas ang presyo ng langis dahil sa digmaan ng US at Israel laban sa Iran.
Wala namang naging kasunduan sa pagpupulong ng G7 finance ministers at International Energy Agency (IEA) tungkol sa paglalabas ng strategic crude reserves. Umabot sa halos $120 kada bariles ang presyo ng langis nitong Lunes bago bumagsak nang bahagya matapos magpahayag si US President Donald Trump na posibleng matapos na ang digmaan.
Sa pagpupulong, tinalakay ang posibilidad na gumamit ng stockpiles habang inihayag na maraming produksyon ng langis ang naapektuhan at may panganib sa global market. May hawak ang mga bansa ng IEA na 1.2 bilyong bariles ng public emergency oil stocks at karagdagang 600 milyong bariles ng industry stocks.
Ang malaking pagkaantala sa suplay mula sa rehiyon ay nagbabadya ng pagtaas ng presyo para sa mga konsumer at negosyo, na maaaring makaapekto sa desisyon ng mga central bank sa interest rates.
Mahigit 1/5 na bahagi ng pandaigdigang suplay ng langis ang dumadaan sa Strait of Hormuz, ngunit halos huminto ito mula nang magsimula ang digmaan.
