Nagbahagi si Raymond Gutierrez ng isang mahiwagang mensahe para sa mga taong umano’y nagkakalat ng kasinungalingan upang itago ang kanilang sariling katotohanan. Sa kanyang Instagram Story, nagpaalala ang host at entrepreneur sa kanyang followers na maging mapanuri sa mga taong hindi umano tapat sa kanilang sariling buhay.
Walang tinukoy na pangalan si Raymond at hindi rin niya ipinaliwanag kung ano ang nagtulak sa kanya na magbahagi ng naturang mensahe. Ilang cryptic posts na rin ang ibinahagi niya nitong mga nakaraang linggo, kabilang ang mensahe tungkol sa pagkakaroon ng “real friends” at pagpapahalaga sa mga taong tunay na nakapaligid sa kanya.
Nagbahagi rin si Raymond ng saloobin kaugnay sa mga pagbaha na nakaapekto sa Metro Manila at iba pang bahagi ng bansa, kung saan nanawagan siyang dapat mas pagtuunan ng pansin ang kalagayan ng mga Pilipino kaysa sa mga usaping fashion at iba pang bagay na hindi umano prayoridad.
Samantala, may ilang netizens na nag-uugnay sa kanyang mga post sa naging pahayag kamakailan ni Heart Evangelista tungkol sa mga taong umano’y nanlalait sa kanya. Gayunman, walang kumpirmasyon mula kina Raymond at Heart na magkakaugnay ang kanilang mga pahayag, kaya nananatiling haka-haka lamang ang naturang espekulasyon.
