Isinagawa ng Anti-Red Tape Authority (ARTA) ang isang malawakang training at workshop sa Northern Luzon bilang bahagi ng patuloy na kampanya ng pamahalaan laban sa red tape at upang mapabilis ang pagproseso ng mga dokumento sa iba’t ibang ahensya.
Layunin ng programa na palawakin ang kaalaman ng mga kawani ng gobyerno sa tamang workflow at paggamit ng makabagong teknolohiya.
Sa panayam ng Bombo Radyo Cauayan kay Ms. Sheila Rosemarie Songgadan, Regional Chief ng ARTA Northern Luzon Regional Field Office, sinabi niyang dinaluhan ang aktibidad ng iba’t ibang lokal na opisyal, department heads, at frontliners mula sa iba’t ibang probinsya sa Northern Luzon.
Isa sa mga pangunahing tinalakay ay ang pag-adopt ng digital systems upang mabawasan ang manual process na madalas nagiging sanhi ng delay sa paglalabas ng mga dokumento. Binigyang-diin din niya ang kahalagahan ng standard processing time at pagkakaroon ng malinaw na guidelines sa bawat transaksyon upang maging mas episyente ang serbisyo publiko.
Kaugnay nito, sinabi ni OIC May Anthonette Bahom ng Resource Management Office ng Santiago City, na nagsasagawa na sila ng mga karagdagang hakbang upang mapabilis ang pagtugon sa mga transaksyon sa kanilang opisina.
Kabilang sa kanilang mga inisyatiba ang pag-upgrade ng online service platforms, pagdaragdag ng personnel sa mga tanggapang mabigat ang transaksyon, at pagpapatupad ng regular na assessment upang matukoy ang mga bottleneck sa proseso.
Dagdag pa ni Ms. Bahom, ang pakikipagtulungan nila sa ARTA ay malaking hakbang tungo sa mas mabilis, episyente, at transparent na serbisyo para sa publiko. Bahagi umano ito ng kanilang pangmatagalang commitment na gawing mas accessible at mas magaan ang pagkuha ng permits, clearances, at iba pang dokumento para sa mga mamamayan at negosyante.
Inaasahang magbubunga ng positibong pagbabago ang mga pagsasanay at repormang ipinapatupad, hindi lamang sa Santiago City kundi sa buong Northern Luzon, habang nagpapatuloy ang pambansang kampanya ng ARTA para wakasan ang red tape at palawakin ang digital transformation sa sektor publiko.
