Dalawang ektarya ng damuhan at nakatambak na ipa, natupok ng apoy sa naganap na rubbish at grass fire sa Cauayan City

CAUAYAN CITY – Tinupok ng apoy ang dalawang ektaryang damuhan at nakatambak na ipa sa naitalang grass fire at rubbish fire sa Nungnungan 1, Cauayan City.

Naitala ito sa dalawang rice mill compound sa naturang barangay.

Sa naging panayam ng Bombo Radyo Cauayan kay Eleazar Espinas, nakakita sa sunog, sinabi niya na aabot sa limang metro ang taas ng apoy kaya nadamay din ang mga nakatambak na ipa sa kabila ng mataas na bakod.

Natakot din sila kaya inilayo nila sa lugar ang mga truck na may kargang palay.

Nagpaalala naman ang mga kawanihan ng pamatay sunog na iwasan ang pagsusunog ng mga basura at damuhan maging ang basta pagtatapon ng upos ng sigarilyo upang maiwasan ang mga katulad na pangyayari.