Opisyal nang umatras ang defense team ni dating Pangulong Rodrigo Duterte sa kanilang hiling na i-appeal ang isang “confidential decision” sa International Criminal Court (ICC).
Ang abiso ay pinirmahan ng lead counsel ni Duterte na si Atty. Nicholas Kaufman. Ito ay kasunod ng kautusan ng Chamber noong Marso 13 tungkol sa unang request ng depensa.
Nag-ugat ang alitan sa pagtatangkang i-disqualify ng depensa ang Common Legal Representatives for Victims (CLRV), partikular sina Joel Butuyan at Gilbert Andres, pati na rin ang kanilang Case Manager na si Nicolene Arcaina.
Orihinal na tinanggihan ng Pre-Trial Chamber I—na binubuo nina Presiding Judge Iulia Antoanella Motoc, Judge Reine Adélaïde Sophie Alapini-Gansou, at Judge María del Socorro Flores Liera—ang disqualification petition noong Pebrero 20, 2026.
Nagsimula ang kaso noong Abril 17, 2025, nang inutusan ng Chamber ang Registry na ayusin ang common legal representation para sa mga biktima. Noong Enero 26, 2026, inatasan ng Registry sina Butuyan, Andres, at isang abogado mula sa Office of Public Counsel for Victims (OPCV) bilang common legal representatives. Sa parehong araw, ipinaalam ng CLRV team na si Arcaina ay sumali bilang case manager.
Bagaman mananatiling classified ang detalye ng desisyon na “Decision ICC-01/21-01/25-390-Conf.,” nais ng depensa na i-appeal ito sa Appeals Chamber. Sa pinakahuling filing, binanggit ni Kaufman na ang withdrawal ng appeal request ay “without prejudice,” na nangangahulugang maaaring ilabas muli ng depensa ang isyu sa hinaharap.
Ayon kay Kaufman, patuloy na nag-aalala ang depensa sa papel ng mga abogado ng biktima at plano pa rin nilang tugunan ang tinuturing nilang hadlang sa representasyon ng Common Legal Representatives for Victims.
