Bilang tugon sa ipinatupad na parusa ng Beijing laban kay dating Senador Francis Tolentino, ipinatawag ng Department of Foreign Affairs (DFA) ang Chinese ambassador sa Maynila upang ipahayag ang mariing pagtutol ng pamahalaan ng Pilipinas.
Ayon kay DFA Secretary Theresa Lazaro, ang hakbang ng China ay isang malinaw na paglabag sa prinsipyo ng respeto sa soberanya at pantay na dayalogo sa pagitan ng mga bansa. Aniya, hindi katanggap-tanggap na parusahan ang isang halal na opisyal ng isang demokratikong bansa dahil lamang sa kanyang opisyal na tungkulin at paninindigan.
Noong Hulyo 1, inanunsyo ng China ang pagpataw ng sanctions kay Tolentino, kabilang ang pagbabawal sa kanyang pagpasok sa mainland China, Hong Kong, at Macao. Ayon sa Beijing, ang desisyon ay bunsod ng umano’y “malicious acts” ng dating senador kaugnay sa mga isyung may kinalaman sa China.
Si Tolentino ang pangunahing may-akda ng dalawang batas na may layuning pagtibayin ang karapatan ng Pilipinas sa West Philippine Sea—mga panukalang tinutulan ng China at itinuturing nitong mapanulsol. Bukod dito, noong nakaraang taon ay ibinunyag din ni Tolentino sa Senado ang umano’y lihim na operasyon ng Chinese embassy upang siraan ang mga kritiko ng China sa Pilipinas.
Sa kabila ng parusa, tinanggap ito ni Tolentino bilang isang “badge of honor,” at iginiit na hindi siya uurong sa pagtatanggol sa karapatan ng bansa sa harap ng pananakot. “Hindi ito personal na laban, kundi laban para sa ating soberanya,” aniya.
