Sinentensyahan ng 75 taong pagkakakulong ang dating Power Minister ng Nigeria na si Saleh Mamman matapos mapatunayang nagkasala sa kasong money laundering na umaabot sa 33.8 bilyong naira o katumbas ng humigit-kumulang $24.71 milyon.
Pinagtibay ng Federal High Court sa Abuja ang hatol matapos mapatunayang guilty si Mamman sa lahat ng 12 kasong isinampa ng Economic and Financial Crimes Commission (EFCC).
Ipinakita sa kaso na ginamit umano ang mga pribadong kumpanya para ilipat ang pondo na sinasabing galing sa ilegal na aktibidad na may kaugnayan sa mga proyektong pinondohan ng pamahalaan tulad ng Mambilla at Zungeru hydroelectric power projects.
Nag-utos ang korte na arestuhin si Mamman sa loob at labas ng Nigeria upang maipatupad ang kanyang sentensya, matapos siyang mahatulan in absentia.
Patuloy namang tinutugunan ng Nigeria ang malalaking kasong korapsyon sa gobyerno, habang ang EFCC ang pangunahing ahensya na humahabol sa mga financial crimes sa bansa.
