Halos dumoble sa tinatayang P190,000 kada tao ang gastos sa pagpapauwi ng mga overseas Filipino workers (OFWs) dahil sa pagtaas ng pamasahe sa eroplano at insurance, kasunod ng lumalalang tensyon sa Gitnang Silangan.
Batay sa paunang ulat ng Senate committee on proactive response and oversight na pinamumunuan ni Sen. Sherwin Gatchalian, mabilis na nauubos ang pondo ng pamahalaan para sa emergency repatriation.
Iniulat ng Overseas Workers Welfare Administration (OWWA) na halos 20 porsiyento ng kabuuang P1.6 bilyong pondo para sa repatriation ang nagamit na ilang linggo pa lamang mula nang magsimula ang krisis sa Gulf region.
Ayon sa mga opisyal, mula sa dating mas mababa sa P100,000, umabot na sa humigit-kumulang P190,000 ang gastos sa bawat OFW dahil sa mas mahal na airline tickets at pinalawak na insurance coverage.
Tinataya ng komite na kung isang porsiyento lamang ng tinatayang 2.4 milyong OFWs sa Middle East ang kailangang ilikas, o katumbas ng 24,000 manggagawa, aabot sa P4.8 bilyon ang kakailanganing pondo—na maaaring agad na maubos ang kasalukuyang reserba ng pamahalaan.
Iminungkahi ni Gatchalian ang paggamit ng contingent funds ng gobyerno o ang pagpasa ng supplemental budget upang matugunan ang agarang pangangailangan sa repatriation at reintegration ng mga OFW.
Nanawagan din siya ng pangmatagalang “whole-of-government” na estratehiya para sa reintegration ng mga nagbabalik na manggagawa, at sinuportahan ang panukalang Bagong Balikbayan Act upang matiyak ang tuloy-tuloy na tulong mula deployment hanggang sa kanilang pagbabalik sa bansa.
Samantala, ayon sa Department of Migrant Workers (DMW), may karagdagang 344 Pilipino, kabilang ang 228 OFWs, ang nakauwi na sa bansa sa pamamagitan ng ikapitong government-chartered flight mula Dubai.
Sa hiwalay na panukala, iminungkahi naman ni Risa Hontiveros ang P52.8 bilyong supplemental fund, kung saan P18 bilyon ang ilalaan upang palakasin ang emergency repatriation efforts ng DMW katuwang ang OWWA.
