Nilinaw ng ISELCO 1 – Santiago Branch Office ang tamang proseso ng muling pagkakabit ng kuryente matapos makabayad ang isang consumer, kasunod ng ilang katanungan kung bakit hindi agad naibabalik ang serbisyo kahit nakapagbayad na ng kanilang bill at reconnection fee.
Sa panayam ng Bombo Radyo Cauayan kay Noemi Valdez, Branch Office Supervisor ng ISELCO 1 – Santiago Branch Office, sinabi niyang may sinusunod na hanggang 24 oras na timeframe para sa reconnection alinsunod sa umiiral na patakaran.
Ipinaliwanag ni Valdez na kahit nakapagbayad na ang consumer ng kanilang bayarin at reconnection fee, hindi ito agad naibabalik dahil kailangan munang dumaan sa proseso ng paggawa ng service memo mula sa Consumer Welfare Officer (CWO).
Aniya, ang naturang service memo ang nagsisilbing opisyal na dokumentong magiging batayan ng mga lineman o outsourcing personnel upang maisagawa ang reconnection.
Ayon pa sa kanya, matapos magawa ang service memo ay ipinapasa ito sa guard ng tanggapan at saka ibinibigay sa mga lineman na siyang pupunta sa lugar ng consumer upang muling ikabit ang linya ng kuryente.
Dagdag pa ni Valdez, may mga pagkakataong naaantala ang reconnection dahil may ilang consumer na hindi na pumupunta sa Consumer Welfare Officer upang magpagawa ng service memo matapos magbayad. Dahil dito, wala umanong dokumentong pagbabatayan ang mga lineman upang agad na mapuntahan ang consumer at maisagawa ang reconnection.
Binanggit din niya na may mga sitwasyon na hindi agad napupuntahan ang consumer dahil hindi makontak ang ibinigay na contact number. Ayon kay Valdez, may mga pagkakataon na ilang beses tumatawag ang lineman ngunit walang sumasagot, kaya naitatala sa record na “no response,” dahilan upang maantala ang reconnection.
Kaugnay nito, pinaalalahanan ng ISELCO 1 ang mga consumer na sundin ang tamang proseso kapag naputulan ng kuryente. Kabilang dito ang pagpunta sa Consumer Welfare Officer upang magpagawa ng service memo at ang pagbibigay ng tamang contact number upang madaling makontak ng mga lineman.
Idinagdag pa ni Valdez na kung sakaling hindi pa rin naibabalik ang serbisyo ng kuryente sa loob ng 24 oras matapos makumpleto ang proseso, maaari umanong bumalik ang consumer sa tanggapan ng ISELCO 1 upang ipagbigay-alam ang kanilang concern upang agad itong matugunan.
Samantala, nakikiusap ang ISELCO 1 sa kanilang mga miyembro-konsyumer na kung may mga reklamo ay dumulog na lamang direkta sa kanilang tanggapan sa halip na idaan sa social media tulad ng Facebook upang agad itong maaksiyunan.
Ayon sa kooperatiba, agad naman nilang tinutugunan ang anumang natatanggap na reklamo o concern ng mga konsyumer basta’t ito ay naipapaabot nang maayos sa kanilang branch office.
