Agad na binawian ng buhay ang isang lasing na motorcycle rider matapos siyang magsariling maaksidente sa bahagi ng Diffun Quirino.
Sa panayam ng Bombo Radyo Cauayan kay Pat. Mauriel Tindungan ang imbestigador ng Diffun Police Station, sinabi niya na alas dos ng madaling araw nang maganap ang aksidente na kinasangkutan ng biktimang si Alyas Arvy.
Batay sa kanilang imbestigasyon ang motorsiklo ay papuntang Town Proper mula Cordon, Isabela, nang makarating ang biktima sa lugar ng pinangyarihan ng aksidente ay nawalan umano ang tsuper ng balanse at nag slide ang motorsiklo.
Tumilapon pa ng ilang metro ang biktima bago tumama sa concrete traffic sign na nag resulta sa agaran nitong pagkamatay.
Human error naman ang nakikita nilang dahilan ng aksidente dahil maganda naman ang kondisyon ng kalsada at wala ring gaanong bumabagtas sa lugar.
Batay na rin sa mga nakasaksi mabilis ang pagpapatakbo ng biktima at ayon na rin sa rescuers na tumugon positibo sa Alcohol breath analyzer ang biktima.
Aminado naman ang Diffun Police station na accident prone area ang lugar dahil sa biglang pakurbadang bahagi ng daan sa lugar gayunman hindi naman aniya sila nagkulang sa paglalagay ng signages bilang babala sa mga motorista.
