CAUAYAN CITY – Patay ang isang magsasaka matapos saksakin ng isang ginang sa barangay Rogus, Cauayan City
Ang namatay ay si Oscar Garcia, 56 anyos, may asawa, magsasaka at residente ng Dicamay, San Mariano, Isabela habang ang suspek ay si Nita, 50 anyos, may asawa, magsasaka at residente ng Rogus, Cauayan City.
Lumabas sa imbestigasyon ng Cauayan City Police Station na nagkaroon ng pagtatalo at hindi pagkakaunawaan ang mga sangkot sa bahay ni Edwin Organista na pansamantala nilang tinutuluyan.
Habang nagsasagutan ang mga sangkot ay bigla umanong inatake ni Garcia ang ginang.
Dahil dito ay dinipensahan ng ginang ang kanyang sarili at nasaksak ang magsasaka sa kanyang katawan.
Dinala sa isang pribadong ospital ang biktima subalit namatay habang nilalapatan ng lunas.
Kusang sumuko ang ginang sa mga opisyal ng barangay at ngayon ay nasa pangangalaga na ng Cauayan City Police Station.
Siya ay mahaharap sa kasong homicide.
