Iginiit ni Ombudsman Jesus Crispin “Boying” Remulla na hahabulin at babawiin ng kanyang tanggapan ang mga umano’y ill-gotten wealth na itinago sa Estados Unidos, at binigyang-diin na hindi dapat maging ligtas na kanlungan ang US para sa mga yaman na iligal na nakuha mula sa Pilipinas.
Ginawa ni Remulla ang pahayag sa isang town hall meeting matapos ang 7th Global Conference on Sustainable Development Goal 16 sa punong tanggapan ng United Nations sa New York, ngunit hindi siya nagbanggit ng partikular na indibidwal o ari-ariang target ng operasyon.
Binigyang-diin din niya ang patuloy na reporma sa Office of the Ombudsman, kabilang ang digital transformation, pagpapalakas ng transparency, at pakikipagtulungan sa overseas Filipinos upang mas mapaigting ang kampanya laban sa katiwalian.
Matatandaang sinabi rin ni Remulla ngayong buwan na pinaigting na ng Ombudsman ang imbestigasyon sa mga iregularidad sa flood control projects, kung saan may 209 reklamo na nasa fact-finding investigation at apat na kaso na ang naisampa sa korte.
Sa kanyang pahayag, iginiit ni Remulla na ang US ay hindi dapat maging taguan ng mga yaman na nakamamatay sa integridad ng pamahalaan, at nanawagan ng mas matibay na kooperasyon sa pandaigdigang antas upang labanan ang korapsyon.
