Nagbabala ang isang grupo ng truckers na magpapatupad sila ng hindi bababa sa 30% na pagtaas sa singil sa kanilang serbisyo dahil sa patuloy na pagtaas ng presyo ng langis dulot ng krisis sa Middle East. Posibleng magdulot ito ng pagkaantala sa delivery ng kargamento at makaapekto sa suplay ng pagkain.
Ayon kay Maria Zapata, presidente ng Confederation of Truckers Association of the Philippines Inc., napagdesisyunan ang dagdag-singil matapos umabot sa P90 kada litro ang fuel, habang ang diesel na halos 50% ng kanilang gastos ay umabot na o lumagpas sa P100 kada litro.
Magkakaroon ang grupo ng konsultasyon sa mga miyembro upang matukoy ang pinakamahusay na hakbang sa pakikipag-ugnayan sa kanilang mga kliyente. Maaari rin silang humingi ng konsiderasyon mula sa kliyente upang mabawi ang tumataas na gastos sa fuel.
Nanawagan si Zapata sa pamahalaan na isama ang sektor ng trucking sa mga makatatanggap ng ayuda sa gitna ng krisis sa langis, upang maiwasan ang karagdagang epekto sa suplay at transportasyon.
Muling tumaas ang presyo ng fuel ngayong linggo, kung saan ang diesel ay nasa P20.40 hanggang P23.90 kada litro, gasolina P12.90 hanggang P16.60, at kerosene P6.90 hanggang P8.90. Nagbabala rin ang Iran na maaaring umabot sa $200 kada bariles ang presyo ng krudo dahil sa tensyon at limitasyon sa Strait of Hormuz.
