Muling sinimulan ng Emirates ang kanilang mga biyahe papasok at palabas ng Dubai matapos bahagyang muling buksan ang airspace ng United Arab Emirates sa gitna ng patuloy na tensyon sa Gitnang Silangan.
Ayon sa advisory na inilabas ngayong Biyernes, magpapatakbo ang airline ng mahigit 100 flight ng Marso 5 at 6 upang magsakay ng mga pasahero at maghatid ng mahahalagang kargamento tulad ng perishable goods at pharmaceuticals. Binanggit ng Emirates na unti-unti nitong itinatayo muli ang iskedyul ng kanilang flights batay sa kakayahang magamit ang himpapawid at mga kinakailangang operational requirements, at patuloy na minomonitor ang sitwasyon upang maangkop ang operasyon nang naaayon sa kaligtasan ng lahat.
Pinayuhan din ang mga pasahero na dumating lamang sa paliparan kung may kumpirmadong booking.
Dahil sa tumitinding tensyon sa Middle East, mahigit 110 flight papunta at mula sa Pilipinas ang kinansela. Lalo pang lumala ang sitwasyon matapos ang US-Israeli airstrikes na ikinasawi ng Iranian Supreme Leader na si Ayatollah Ali Khamenei, na kinumpirma rin ng Iranian state media.
Naunang sinabi ni US President Donald Trump na magpapatuloy ang combat operations sa Iran hanggang makamit ang lahat ng layunin ng operasyon, at kinumpirma rin na tatlong US service members ang nasawi habang posibleng tataas pa ang bilang ng casualties.
