CAUAYAN CITY- Arestado ang dalawang lalaki sa isinagawang drug buy bust operation ng Cauayan City Police Station sa Turayong, Cauayan City, Isabela.
Ang mga nadakip ay sina Rafael Agustin, dalawamput dalawang taong gulang, self employed at residente ng Brgy. District 1, Cauayan City at si Alyas RR, 17- anyos at residente ng Brgy. Turayong, Cauayan City.
Nabili sa kanila ng pulis na nagpanggap na buyer ang sampung gramo ng dried marijuana leaves na nagkakahalaga ng 1,200 pesos.
Nakuha din sa kanilang pag-iingat ang tatlong gramo ng dried marijuana leaves na naka balot sa papel, itim na bag at iba pang personal na gamit ng mga pinaghihinalaan.
Napag-alaman na ang menor de edad na sangkot ay dating drug surrenderee at isinuko siya noon ng kaniyang lola noong kasagsagan ng Oplan Tokhang ng nakaraang administrasyon.
Aminado naman siya na gumagamit ng ilegal na droga.
Sa ngayon ay nasa kustodiya na ng PNP Cauayan ang mga pinaghihinalaan para sa dokumentasyon at kaukulang disposisyon.
