CAUAYAN CITY – Nasugatan ang anim na sakay ng tricycle sa karambola ng tatlong sasakyan sa national highway sa Antonino, Alicia, Isabela.
Ang mga nasugatan ay ang tsuper ng tricycle na si Alexander Patacsil, 40 anyos at mga pasahero na sina Belinda Patungan, Ruby Ann Tutaan, Elmer Marquez, Emelinda Octubre at isang 3 anyos na batang babae, pawang residente ng Alicia, Isabela.
Sa nakuhang impormasyon ng Bombo Radyo Cauayan, galing Tuguegarao City ang delivery van na minaneho ni Mark Anthony Nazareno at pauwi na sana ng San Fernando, Pampanga nang mag-overtake at umagaw ng linya ang isang motorsiklo.
Ito ang dahilan kaya nahagip ng delivery van ang tricycle na naging sanhi para magtamo ng sugat sa katawan ang mga sakay nito.
Isinugod ang mga biktima sa ospital sa Alicia, Isabela.
Handa umano si Nazareno na tumulong sa gastusin sa pagpapagamot ng mga biktima.
