CAUAYAN CITY – Sumuko na ang isang pulis na bumaril sa isang sundalo kaninang 12:36 ng hatinggabi sa paradahan ng Manggahan Grill sa Alibagu, City of Ilagan.
Ang binaril ng dalawang beses ay si Army Corporal Richard Limon, 32 anyos residente ng Barangay Polar, City of Ilagan.
Ang bumaril ay si PSSgt Glen Mark Geronimo, 32 anyos din, may-asawa, miyembro ng Isabela Police Mobile Force Company (IPMFC) at residente ng Barangay San Vicente, City of Ilagan.
Sa nakuhang impormasyon ng Bombo Radyo Cauayan sa Isabela Police Provincial Office (IPPO) nagkaroon ng mainitang pagtatalo ang pulis at sundalo.
Bumunot ng baril si PSSgt Geronimo at binaril ng dalawang beses si Corporal Limon.
Agad isinugod sa ospital ang sundalo para malapatan ng lunas.
Tumakas naman Geronimo matapos ang pamamaril ngunit sumuko matapos ang ilang oras sa City of Ilagan Police Station.
