CAUAYAN CITY – Nasugatan ang apat na tao kabilang ang isang bata sa banggaan ng kolong-kolong at motorsiklo sa Villamor, Cabarroguis, Quirino.
Ang mga biktima na sakay ng kolong-kolong ay sina John Reynon Baday, 28 anyos at sakay na si Jonh Rey Baday, 5 anyos.
Ang tsuper ng nakabanggaang motorsiklo ay si Jannel Awana, residente ng Aurora West, Diffun, Quirino.
Nasugatan ang angkas na si Oliver John Abalos, residente ng Villa Ventura, Aglipay, Quirino.
Sa imbestigasyon ng Cabarroguis Police Station, binabagtas ng mga biktima at suspek ang daan sa magkasalungat na direksyon nang biglang humarurot ang motorsiklo para lampasan ang sinusundang tricycle ngunit nabangga ang paparating na kolong-kolong.
Pawang nagtamo ng sugat sa ulo at iba’t ibang bahagi ng katawan ang mga biktima na dinala sa ospital ng mga tumugon na kasapi ng Rescue team para sila ay malapatan ng lunas.
Dinala sa Cabarroguis Police station ang mga sangkot na sasakyan para sa kaukulang disposisyon.
