CAUAYAN CITY – Nag-uwi ng mga awards ang Robotics Team ng Cauayan City National High School (CCNHS) sa kanilang paglahok sa RoboRave Philippines 2019 na ginanap sa Camp Benjamin, Alfonso, Cavite noong October 26 at 27, 2019.
1st place sila sa Entrepreneurial Challenge (Best Research) habang 3rd place sila sa Entreprenuerial Challenge (Best Business Card) at 3rd place din sa IQ Innovative Challenge.
Kasama sa Robotics Team ng CCNHS sina Justin Reign Aguinaldo bilang team lader, Keith Veniz, Lorraine Kei Aguinaldo, Micah Seiri, Jozsa Marlise Paz, Athea Lois Lucas, Aira Mae Velasquez, Hans Cleverzon Diaz, KC Morales Edra, Jarred Aquino Mates at Christian Joshua Quilang Alberto.
Ang coach nila ay sina Mr. Ronnel Asuncion at Ms. Agnes Trinidad Palaruan.
Naiuwi naman ng Robotics Team ng Philippine Yuh Chiao School sa Cabatuan, Isabela ang 2nd place habang 3rd place ang Maritime School sa Bataan.
Ang mga nanalong Robotics Team ay naimbitahan na maging kinatawan ng bansa sa gaganaping RoboRave International sa Australia.
Ayon kay Justine Reign Aguinaldo, malaking karangalan na tanghaling kampeon lalo na at ito ang kauna-unahang pagkakataon na lumahok ang CCNHS sa nasabing kompetisyon.
Nakatunggali ng CCNHS Robotics Team ang iba’t ibang pampubliko at pribadong paaralan sa Pilipinas kabilang na ang University of the Philippines (UP) Integrated School at Philippine Science High School (PSHS).
Unang nagwagi ng gintong medalya ang CCNHS Robotics Team sa National Robotics Competition noong Pebrero 2019.
Nakatuon ang kanilang robot sa pagkuha ng impormasyon sa tubig na maaaring gamitin ng Bureau of Fisheries and Aquatic Resources (BFAR).
