CAUAYAN CITY – Nasugatan ang dalawang sales agent matapos salpukin ng kotse ang sinasakyan nilang motorsiklo sa Roxas, Solano, Nueva Vizcaya.
Ang mga biktima ay sina Wayne Mark Dacayo, 19-anyos, driver ng motorsiklo, residente ng nasabing lugar at Claidy Via Pili, 21-anyos, residente ng Lactawan, Solano at kapwa sales agent.
Sa naging pagsisiyasat ng Solano Police Station, binabaybay ni Dacayo ang Manzano Street patungong Silangang direksyon habang binabagtas naman ng kotse ang Bonifacio Street patungong hilagang direksyon nang makarating sa pinangyarihan ng aksidente ay bigla na lamang sinalpok ng kotse ang motorsiklo.
Nagtamo ng matinding sugat sa iba’t ibang bahagi ng kanilang katawan ang mga biktima na agad itinakbo sa pinakamalapit na pagamutan para malapatan ng lunas.
Sa ngayon ay pinaghahanap pa rin ng pulisya ang driver ng kotse na mabilis tumakas matapos ang aksidente.
