CAUAYAN CITY – Patay ang isang lalaki matapos umanong manlaban sa isinagawang drug buy-bust operation kaninang alas dos ng madaling araw sa Cabaruan, Cauayan City.
Ang napatay ay si Zenus Dela Cruz, nasa tamang edad at residente ng Sinippil, Reina Mercedes, Isabela.
Ang mga operatiba ng Cauayan Police na pinamumunuan ni PLt Col. Gerald Gamboa sa pakikipag-ugnayan sa Philippine Drug Enforcement Agency (PDEA) region 2 ay nagsagawa ng drug buy-bust operation na nagbunga umano ng palitan ng putok at nasawi ang suspek.
Ang pulis na nagpanggap na poseur/buyer ay nakabili umano kay Dela Cruz ng isang heat sealed transparent plastic sachet na naglalaman ng white crystalline substance na hinihinalang suspected methamphetamine hydrochloride o Shabu.
Nakatunog umano si Dela Cruz na pulis ang kanyang katransaksiyon kaya binunot ang kanyang baril at nagpaputok habang nasa loob ng kanyang Toyota Corolla Sedan na may plate number TFW 843.
Nakaganti umano ang mga pulis at pinaputukan ang suspek.
Tumugon ang mga miyembro ng Rescue 922 at dinala si Dela Cruz sa Cauayan City District Hospital ngunit idineklarang dead on arrival ng attending physician.
Ang mga miyembro ng Scene of the Crime Operatives (SOCO) Cauayan City ay nagsagawa ng crime scene process.
