CAUAYAN CTY – Pitumpung bahagdan na ang naideklara ng Philippine Drug Enforcement Agency (PDEA) na drug cleared barangay sa region 2.
Sa pinakahuling talaan ng PDEA region 2, 28% ang patuloy pang inaasikaso ng kanilang hanay at patuloy ang pakikipag-ugnayan sa Philippine National Police (PNP) at Local Government Units (LGU’s) hinggil sa kampanya kontra iligal na droga.
Sa naging panayam ng Bombo Radyo Cauayan, inihayag ni Regional Director Joel Plaza ng PDEA region 2 na kabilang sa mga tinututukan nila sa kampanya laban sa doga ay ang mas mahigpit na pakikipag-ugnayan sa PNP para magkaroon ng high impact operations.
Puntirya sa kanilang operasyon ang mga pinagmumulan ng illegal na droga at mga High Value Individual (HVI) na kabilang sa kanilang talaan.
Patuloy din ang kanilang pakikipag-ugnayan sa iba’t ibang LGU kabilang ang Inter-Agency Committee Against Dangerous Drugs ICAD na may layuning paigtingin ang barangay drug clearing program.
Sa pamamagitan ng ICAD ay nabuo ang Barangay Drug Abuse Council (BADAC) na nakatuon sa pagpapatupad ng drug clearing program sa kanilang lugar.
Isa rin sa binibigyan nila ng pansin ang pagsasagawa ng Drug Free Workplace Program na may layuning maiwasan ang pagkakasangkot ng mga empleyado ng pamahalaan sa illegal na droga at sinabing malaking bagay ang suporta ng komunidad sa kanilang mga hakbang.
