Naipasa na ng Office of the House Secretary General sa tanggapan ni House Speaker Faustino “Bojie” Dy III ang dalawang verified impeachment complaint laban kay Vice President Sara Duterte, na inihain noong Pebrero 2.
Ayon kay House Secretary General Cheloy Garafil, pormal nang naipadala ang mga reklamo sa opisina ng House Speaker kahapon, Pebrero 5, alinsunod sa Konstitusyon, mga patakaran ng House of Representatives, at umiiral na mga protocol.
Ang unang reklamo ay inihain ng mga miyembro ng Makabayan Coalition at inendorso nina Party-list Representatives Antonio Tinio (Alliance of Concerned Teachers), Sarah Elago (Gabriela Women’s Party), at Renee Co (Kabataan Party-list).
Samantala, ang ikalawang reklamo ay inihain ng mga kinatawan ng iba’t ibang progresibong organisasyon at civil society groups sa pangunguna ng Tindig Pilipinas, at inendorso nina Party-list Representatives Leila de Lima (Mamamayang Liberal) at Perci Cendaña (Akbayan).
Ayon sa umiiral na proseso, may sampung araw ang Office of the Speaker upang maisama ang dalawang impeachment complaint sa Order of Business ng plenary session bago ito mairefer sa House Committee on Justice.
