Daan-daang kabataan ang nagsagawa ng protesta sa Nanyuki, Kenya upang tutulan ang pagtatayo ng isang Ebola quarantine facility para sa mga Amerikanong nahantad sa virus sa Laikipia Air Base.
Ang protesta ay naganap matapos pansamantalang ipasuspinde ng High Court ng Kenya ang pasilidad dahil sa pangambang hindi kaya ng marupok na sistema ng kalusugan sa bansa ang mag-asikaso ng mga dayuhang pasyente.
Una rito, binalak ng Estados Unidos na magpadala ng mga pasyente sa naturang base militar sa halip na iuwi sila sa Amerika, kapalit ng $13.5 milyong tulong para sa bansa.
Bagamat nilinaw ni Health Minister Aden Duale na bukas sa lahat ang pasilidad, mariing tinutulan ito ng mga lokal na opisyal tulad ni Laikipia Governor Joshua Irungu dahil sa takot na mahawa ang mga residente.
Kasalukuyang walang naitalang kaso ng Ebola ang Kenya, habang patuloy naman ang pagdami ng kaso sa kalapit-bansa nitong Congo at Uganda.
