Humiling si dating Department of Education special disbursing officer Edward Fajarda na ipagpaliban muna ang kanyang pagdalo sa impeachment trial ni Vice President Sara Duterte mula Agosto 24 hanggang 26 matapos umano siyang ma-stroke.
Ayon kay Senate impeachment court presiding officer Francis Escudero, nakatanggap ang korte ng liham at medical certificate mula sa abogado ni Fajarda.
Batay sa mga dokumento, isinailalim umano sa intensive care si Fajarda matapos ma-stroke sa ibabang likurang bahagi ng utak. Nailipat na umano siya sa regular na silid.
Gayunman, hindi agad pinagbigyan ng korte ang kahilingan. Inatasan ni Escudero ang Senate Medical and Dental Bureau na suriin si Fajarda at beripikahin sa kanyang mga doktor ang medical findings bago magsumite ng ulat sa impeachment court.
Ipinatawag si Fajarda bilang testigo kaugnay ng Article I ng impeachment complaint hinggil sa umano’y maling paggamit ng P612.5 milyong confidential funds mula sa OVP at DepEd.
Samantala, hiniling ni House lead prosecutor Gerville Luistro ang certified true copy ng medical certificate ni Fajarda at iminungkahing itakda sa Setyembre 7 ang kanyang pagharap bilang testigo.
Itinala naman ng impeachment court ang kahilingan ni Luistro.
