Kinansela ng Senate Impeachment Court ang nakatakdang pagdinig sa impeachment trial ni Vice President Sara Duterte ngayong Miyerkules, Setyembre 30, at magpapatuloy ito sa Oktubre 1.
Inihayag ang kanselasyon sa pamamagitan ng abiso na inilathala sa social media page ni Impeachment Spokesperson Atty. Reginald Tongol nitong Martes ng gabi.
Kinumpirma rin ni Senate Secretary at Impeachment Clerk of Court Renato Bantug Jr., gayundin ni Senate Majority Floor Leader Juan Miguel Zubiri, ang kanselasyon ng pagdinig.
Ayon kay Tongol, ang hakbang ay isang “strategic procedural pause” upang mabigyan ng sapat na panahon ang prosecution at defense panels na makapaghanda para sa sunod-sunod na whole-day trial sessions mula Oktubre 1 hanggang 15.
Sinabi niyang mahalaga rin ang pansamantalang paghinto upang masuri ng magkabilang panig ang mga teknikal at malalaking dokumentong pinansyal na inaasahang manggagaling sa Anti-Money Laundering Council (AMLC) at mga Registry of Deeds.
Nilinaw naman ni Tongol na hindi nangangahulugan ng pagkaantala ang kanselasyon ng pagdinig.
Aniya, mabilis ang naging usad ng paglilitis mula nang simulan ang pagtalakay sa Article II noong Setyembre 14, kung saan nakapagpresenta na ang prosecution ng anim na testigo sa loob ng walong araw.
Sa kasalukuyan, nakatuon ang pagdinig ng impeachment court sa Article II ng Articles of Impeachment na may kaugnayan sa alegasyon ng unexplained wealth laban kay Vice President Duterte.
