Rep. Pulong Duterte, nagsampa ng kasong libel at cyber libel kaugnay ng alegasyon sa ₱100-milyong cash delivery sa ilang indibidwal

Naghain ng complaint-affidavit si Davao City 1st District Representative Paolo “Pulong” Duterte sa Office of the City Prosecutor sa Davao City laban sa ilang indibidwal dahil sa umano’y libel at cyber libel.

Kabilang sa mga pinangalanang respondent sina Atty. Melvin A. Matibag, Rodulfo M. Gracioso Jr. at Felipe L. Gozon, kasama ang iba pang indibidwal.

Inihain ang reklamo sa gitna ng kontrobersiya kaugnay ng mga alegasyon ni Gracioso tungkol sa umano’y paghahatid ng pera na kinasasangkutan ng ilang miyembro ng pamilya Duterte.

Kabilang sa mga alegasyon ang umano’y paghahatid ng ₱100 milyon kay Congressman Pulong Duterte. Hindi nangangahulugan ang paghahain ng reklamo na napatunayan na ang mga alegasyon o may pananagutan na ang mga respondent.