Nabigo ang tambalan nina Khylem Progella at Sofiah Pagara at ang dalawahan nina Sisi Rondina at Bernadeth Pons ng Alas Pilipinas Women na makakuha ng medalya sa 2026 AVC Beach Volleyball Continental Championship.
Ito ay matapos yumukod sina Progella at Pagara kina Stefanie Fejes at Taliqua Clancy ng Australia, 11-21, 14-21, sa quarterfinals kahapon sa Shangluo, China.
Si Clancy ay isang three-time Olympian at Tokyo 2020 Olympic silver medalist.
Nagmula ang mga pambato ng University of Santo Tomas sa 21-10, 21-15 pagsibak kina Tsang Ngok Ling at Wong Man Ching ng Hong Kong sa Round of 16 papasok sa quarterfinals.
Nauna nang tinalo nina Progella at Pagara sina Zamira Shagraeva at Odina Uralova ng Uzbekistan, 21-5, 21-7, at sina Kristina Karimova at Yekaterina Ryukhova ng Kazakhstan, 21-13, 21-14, sa group stage.
Samantala, lumasap ang ‘SiPons’ ng 17-21, 27-25, 6-15 kabiguan kina No. 1 pair Asami Shiba at Reika Murakami ng Japan sa Round of 16.
Maaga namang napatalsik sa torneo sina Alas Pilipinas Men tandem James Buytrago at Ronniel Rosales matapos ang tatlong sunod na kamalasan.
