Patuloy na sinusuri ng Department of Justice (DOJ) ang mga dokumentong isinumite ng Estados Unidos kaugnay ng kahilingan nitong ipa-extradite si Apollo Quiboloy at dalawa pang mataas na opisyal ng Kingdom of Jesus Christ (KOJC).
Ayon sa DOJ, natanggap nito mula sa Department of Foreign Affairs (DFA) ang anim na batch ng mga supporting documents para sa bawat respondent na bahagi ng extradition request.
Bukod kay Quiboloy, kabilang sa kahilingan sina Teresita Tolibas Dandan at Helen Panilag, na kapwa dating mataas na opisyal ng KOJC.
Batay sa superseding indictment ng US Department of Justice, inakusahan ang tatlo na may mahalagang papel sa mga pinansyal at operasyonal na aktibidad ng grupo.
Sinasabing si Dandan ay nangasiwa sa mga operasyon ng KOJC sa Estados Unidos kung saan umano’y pinilit ang ilang miyembro na mangalap ng pondo para sa isang mapanlinlang na charity program. Nahaharap din sina Quiboloy at Dandan sa mga kasong may kaugnayan sa sex trafficking.
Samantala, si Panilag ay iniuugnay sa umano’y visa at marriage fraud schemes na nagbigay-daan upang manatili sa Estados Unidos ang mga fundraiser ng KOJC.
Sa ilalim ng Extradition Treaty ng Pilipinas at Estados Unidos, kailangang tiyakin ng DOJ na ang mga kasong isinampa ay krimen sa parehong bansa at hindi haharap sa parusang kamatayan ang mga respondent sakaling maipasa ang extradition.
