Iniimbestigahan ng mga awtoridad ang naganap na pagsabog sa harap ng NPS Gasoline Station sa Barangay Poblacion II kagabi, araw ng Sabado.
Batay sa ulat ng Shariff Aguak Municipal Police Station, dakong alas-10:43 ng gabi nang makarinig ng malakas na pagsabog ang mga pulis na agad namang rumesponde sa lugar. Pagdating sa pinangyarihan, nadiskubre ng responding personnel ang isang crater malapit sa entrada ng gasolinahan na pinaniniwalaang dulot ng pagsabog.
Wala namang naitalang nasawi o nasugatan sa insidente.
Sa isinagawang imbestigasyon, lumabas sa CCTV footage na may dalawang hindi pa nakikilalang indibidwal na sakay ng motorsiklo na nakita umanong paikot-ikot malapit sa lugar ilang sandali bago ang pagsabog at mabilis ding umalis matapos ang insidente.
Agad namang naglatag ng dragnet checkpoint operations ang Philippine National Police katuwang ang Armed Forces of the Philippines upang matunton ang mga suspek.
Nagsagawa rin ng hot pursuit operations ang Shariff Aguak MPS kasama ang PMFC at 44th Special Action Company habang inaasahang magsasagawa ng post-blast investigation ang bomb experts ng PECU-Maguindanao del Sur.
Patuloy naman ang malalimang imbestigasyon upang matukoy ang pagkakakilanlan ng mga suspek at motibo sa insidente.
