Tinutulan ng kampo ni Senador Ronald ‘Bato’ Dela Rosa ang naging paglalarawan ng National Bureau of Investigation sa senador bilang “armed and dangerous,” at iginiit na wala umano itong sapat na batayan.
Ayon sa abogado ng senador na si Atty. Israelito Torreon, ang naturang pahayag ay walang matibay na basehan at hindi aniya nakatutulong sa maayos at mapayapang pagresolba sa usaping legal na kinahaharap ng senador.
Binigyang-diin ng kampo na si Dela Rosa ay isang nakaupong senador at nananatili umanong maayos at mapayapa ang kanyang pagkilos bilang isang lingkod-bayan at mamamayang Pilipino.
Tinukoy rin ng kampo na nananatiling usapin sa mga korte ang deployment ng mga armadong tauhan para sa pagpapatupad ng arrest warrant na inilabas ng International Criminal Court laban sa senador.
Muli ring iginiit ng kampo ang naging pag-atras ng Pilipinas mula sa Rome Statute noong 2019, gayundin ang kawalan umano ng warrant mula sa mga lokal na hukuman.
Ayon pa sa kampo, hindi umano sinuway ni Dela Rosa ang batas at dapat umanong resolbahin ang mga legal na isyu sa pamamagitan ng tamang proseso ng hudikatura, sa halip na sa paggamit ng puwersa o mga pahayag na maaaring magpalala ng sitwasyon.
Ipinabatid din ng kampo na noong Mayo 22 ay naghain sila ng Manifestation with Reservation to File a Motion for Reconsideration sa Supreme Court of the Philippines kaugnay ng mga bagong pangyayari matapos maibasura ang kanilang hiling na temporary restraining order.
Nanawagan din ang kampo ni Dela Rosa sa NBI at iba pang ahensya ng pamahalaan na pairalin ang pag-iingat at hayaang ang Korte Suprema ang magpasya alinsunod sa Konstitusyon at rule of law.
Tiniyak naman ng kampo ng senador na ipagpapatuloy nila ang kanilang mga legal na hakbang sa tamang proseso, habang ipinapahayag ang kanilang tiwala sa judicial system ng bansa.
