Nasawi sa isang malagim na aksidente sa kalsada sa Zamora, Spain ang star player ng Liverpool na si Diogo Jota, 28 anyos, kasama ang kaniyang kapatid na si André Silva, 25 anyos, habang papunta umano sila sa pantalan upang sumakay ng ferry pabalik sa United Kingdom.
Ayon sa ulat ng lokal na pulisya, binabaybay nina Jota ang A52 highway malapit sa Palacios de Sanabria bandang 12:40 ng madaling araw nang sumabog ang gulong ng kanyang mamahaling Lamborghini Huracan, dahilan upang mawalan siya ng kontrol at bumangga ang sasakyan. Agad itong nagliyab, at parehong idineklarang dead on the spot ang magkapatid.
Si André ay manlalaro rin ng football para sa Penafiel, isang koponang kabilang sa 2nd division sa Portugal.
Labing-isang araw pa lamang ang nakalipas mula nang ikasal si Jota sa kanyang childhood sweetheart na si Rute Cardoso. Ayon sa mga ulat, nagkaroon sila ng tanghalian kasama ang tatlong anak sa isang kilalang beach resort sa Portugal bago ang biyahe.
Nabatid na hindi pinayuhan si Jota na bumiyahe sa eroplano dahil sa kanyang kamakailang operasyon sa lungs, kaya’t napiling bumiyahe pabalik sa UK sakay ng ferry mula Santander.
Nakaplano sanang bumalik si Jota sa Liverpool upang makibahagi sa pre-season training ng kanilang koponan sa mga susunod na linggo.
Mabilis namang rumesponde ang mga bombero at emergency crew sa lugar upang apulahin ang apoy. Sa mga larawang kuha sa aksidente, makikita ang wasak na sasakyan na tinatayang nagkakahalaga ng humigit-kumulang £180,000 o mahigit ₱13 milyon.
Dinala sa forensic unit sa Zamora ang mga labi ng magkapatid para sa awtopsiya. Emosyonal namang nakita si Rute, kasama ang ilang kaanak, na tumutulong sa awtoridad sa pagkilala sa labi ng kanyang asawa.
Gaganapin ang libing ng magkapatid sa kanilang bayan sa Gondomar, malapit sa Porto City, Portugal, sa Sabado ng alas-10 ng umaga.
