Inihayag ni dating Vice President at kasalukuyang Mayor ng Naga City, Leni Robredo, na hindi pa niya iniisip ang posibilidad ng pagtakbo sa 2028 presidential elections. Ayon sa kanya, nakatuon siya sa mga tungkulin niya bilang alkalde at hindi pa siya nag-iisip ng mga usaping politikal sa ngayon.
Idiniin ni Robredo na marami pa siyang mga gawain na kailangang tutukan bilang mayor at hindi pa oras upang pag-usapan ang halalan. Aniya, hindi makatarungan para sa mga tao na pagtuunan ng pansin ang mga eleksyon habang nasa kalagitnaan siya ng kanyang mga responsibilidad bilang lokal na opisyal.
Paliwanag pa ni Robredo, hindi niya itinutok ang kanyang atensyon sa halalan dahil ang kasalukuyang panahon ay para sa trabaho. Ayon pa sa kanya, ang mga eleksyon ay nangyayari lamang tuwing tatlong taon, kaya’t hindi nararapat na gawing pangunahing paksa ang eleksyon sa ngayon.
Samantala, iginagalang naman ni Robredo ang naunang pahayag ni Vice President Sara Duterte na balak nitong tumakbo sa pagka-pangulo, at sinabi niyang karapatan ito ng sinuman na magtakda ng kanilang plano at hinaharap.
