CAUAYAN CITY – Dumulog sa Bombo Radyo Cauayan ang ilang residente sa San Isidro, Cauayan City na hindi kasama sa mga benepisaryo ng Emergency Shelter Assistance Program ng Department of Social Welfare and Development (DSWD) para sa mga sinalanta ng bagyong Rosita noong 2018.
Sa naging panayam ng Bombo Radyo Cauayan kay Ginoong Ernesto Baybayan ng San Isidro, Cauayan City, sinabi niya na totally damaged ang kanyang bahay noong bagyong Rosita ngunit hindi siya kasama sa listahan.
May kumuha ng larawan sa kanyang nasirang bahay matapos ang bagyo kaya umasa siyang kasama siya sa mga benepisaryo ngunit wala siyang natanggap na ayuda.
Dumulog siya sa Bombo Radyo Cauayan para malinawan kahit sinabi ng DSWD na may ikalawang tranche ay hindi siya sigurado kung kasama na siya sa listahan ng mga benepisaryo.
Nagreklamo rin sa Bombo Radyo Cauayan ang senior citizen na si Ricarda Divina dahil kahit nasira ang kanyang bahay at namatayan pa ng anak noong kasagsagan ng bagyong Rosita ay wala siyang natanggap na ayuda.
Sinabi niya na nakatanggap ang kanyang kapitbahay na hindi naman nasiraan ng bahay samantalang siya na namatayan pa ng anak at nasira ang bahay ay wala sa listahan.
Noong isinagawa ang validation ng City Social Welfare and Development (CSWD) ay hindi umano pinuntahan ng barangay secretary ang kanyang bahay na nasira at noong kinompronta niya ay humingi siya ng paumanhin dahil hindi umano nito nakita.
Ayon kay kay Gng. Divina, hindi nakuhanan ng larawan ang kanyang partially damaged na bahay noong validation kaya ito marahil ang dahilan na hindi siya kasama sa listahan.
Sinabi niya na hindi sana siya magrereklamo pero nang malaman niya na may mga nakakuha ng ayuda na hindi nasiraan ng bahay ay nagpasya siyang idulog sa Bombo Radyo Cauayan ang kanyang reklamo para mabigyan ng leksiyon at managot ang hindi gumawa ng kanilang trabaho.
Samantala, ipaparating sa CSWDO ni Barangay Kapitan Juan Edra ng San Isidro, Cauayan City ang reklamo ng kanyang mga kabarangay.
Sa naging panayam ng Bombo Radyo Cauayan, inihayag ni Barangay Kapitan Edra na may kumuha ng mga larawan sa naunang mahigit 20 pamilya na nabigyan ng ayuda na nagkakahalaga ng 2,500 na galing sa pamahalaang Lunsod ng Cauayan noong 2018.
Nilinaw pa niya na totoong nasiraan ng mga bahay ang mga nakakuha ng ayuda dahil nag-ikot noon ang kanilang health worker para ma-validate ang mga nasiraan.
May mga larawan ang kanyang mga nilagdaang pangalan na isinumite sa kanya ng kanilang health worker na si Isabel Jose kaya masasabi niyang lehitimo ito.
Idinagdag pa niya na may 65 pa ang hindi nakakakuha ng ayuda mula sa kanilang listahan ng mga nasiraan ng bahay.
Sinabi pa ni Barangay Kapitan Edra na ang pagkakaalam niya, kapag nakakuha na ng ayuda sa city government ay hindi na sila kasama sa ayuda mula sa DSWD.
