Pinangunahan ni Pope Leo XIV ang Chrism Mass sa St. Peter’s Basilica nitong Huwebes Santo, Abril 2, bilang bahagi ng pagdiriwang ng Semana Santa ng Simbahang Katolika.
Ang Chrism Mass ay isang mahalagang pagdiriwang kung saan binabasbasan ang mga banal na langis na gagamitin sa mga sakramento sa buong taon. Bahagi rin ng misa ang pagsasariwa ng pangako ng mga pari sa kanilang bokasyon sa harap ng mga mananampalataya.
Dinaluhan ang nasabing misa ng daan-daang obispo at pari mula sa iba’t ibang lugar, na muling nagpatibay ng kanilang pangakong paglilingkod sa Simbahan.
Sa kanyang homiliya, binigyang-diin ng Santo Papa ang pagsisimula ng Easter Triduum—ang tatlong pinakamahalagang araw sa Kristiyanismo na ginugunita ang paghihirap, kamatayan, at muling pagkabuhay ni Hesus.
Hinikayat din niya ang mga mananampalataya na pagnilayan ang kanilang misyon bilang mga Kristiyano, na aniya’y katulad ng misyon ni Kristo. Binigyang-pansin niya ang kahalagahan ng detachment, pakikipagtagpo sa kapwa, at ang posibilidad ng hindi pagkakaunawaan o pagtanggi sa pagtupad sa misyong ito.
Ayon pa sa Santo Papa, ang panahong ito ng liturhiya ay may kakayahang magbago ng puso ng tao, maghilom ng sugat, at maghatid ng pagkakaisa.
Sa huli, nanawagan si Pope Leo XIV sa mga Kristiyano na huwag pairalin ang takot, kundi magpatuloy sa pagpapahayag ng pananampalataya sa kamatayan at muling pagkabuhay ni Kristo.
