Pasok na sa FIFA World Cup Final ang Spain matapos talunin ang France, 2-0, sa semifinal match na ginanap sa Dallas Stadium.
Nakuha ng Spain ang unang puntos sa 1st half ng laro matapos maipasok ni Mikel Oyarzabal ang penalty kick na iginawad matapos ang foul kay Lamine Yamal. Ito ang nagbigay sa La Roja ng 1-0 kalamangan bago matapos ang first half.
Nahirapan naman ang France na makabawi matapos mawalan ng pangunahing depensa na si William Saliba dahil sa injury. Nabigo rin ang koponan na makapagtala ng kahit isang shot on target sa unang 45 minuto ng laban.
Sa ikalawang bahagi ng laro, lalo pang pinalaki ng Spain ang kalamangan nang maipasok ni Pedro Porro ang ikalawang goal sa tulong ng mahusay na pasa ni Dani Olmo sa loob ng penalty area.
Sa kabila ng sunod-sunod na pagtatangka nina Kylian Mbappe at Ousmane Dembele sa mga huling minuto ng laban, hindi nagawang makaiskor ng France upang mabawasan ang kanilang pagkakaiwan.
Dahil sa panalo, nakasiguro na ang Spain ng puwesto sa kampeonato at isang hakbang na lamang ang layo upang maiuwi ang titulo ng FIFA World Cup.
Sa kasaysayan ng FIFA World Cup, ito ang ikalawang pagkakataon na makapasok ang Spain sa final matapos nitong makamit ang una at tanging kampeonato noong 2010 nang talunin ang Netherlands sa South Africa.
Samantala, dalawang beses nang naging kampeon ang France sa World Cup noong 1998 at 2018, habang nagtapos naman bilang runner-up noong 2006 at 2022.
Sa kanilang panalo, muling magkakaroon ng pagkakataon ang Spain na masungkit ang ikalawang FIFA World Cup title sa kasaysayan ng bansa habang maghihintay sa kanilang makakalaban sa final.
