CAUAYAN CITY – Magkahiwalay na sumuko sa militar ang isang dating team leader ng New People’s Army (NPA) at dalawang miyembro ng Militia ng Bayan (MB).
Sa naging panayam ng Bombo Radyo Cauayan kay Lt. Col. Gladius Calilan commanding officer ng 95th Infantry Battalion Philippine Army, sinabi niya na isinuko ng mga rebelde ang isang M-14 armalite riffle, isang M-16 armalite riffle at dalawang magazine ng M-14.
Hindi pa pinangalanan ni Lt Col. Calilan ang sumukong team leader ng NPA at dalawang miyembro ng MB ngunit sinabi niya na sila ay taga-San Mariano, isabela.
Pawang menor de edad ang tatlong sumuko nang mahikayat silang sumapi sa kilusan.
Ayon kay Lt Col. Calilan, nahikayat na magbalik-loob sa pamahalaan ang mga rebelde matapos na makita nila ang pagpupursige ng pamahalaan sa pagpapatupad sa mga programa para sa kanila.
Naliwanagan na umano sila na walang kabuluhan ang kanilang ipinaglalaban at ginagamit lamang sila ng kanilang samahan sa kanilang pansariling interes.
Ayon kay Lt Col. Calilan, ang mga kasapi ng MB ay hardcore at mas malala sa mga regular na kasapi ng NPA dahil kasama sila sa tactical offensive ng mga rebelde.
Dumaan sila sa training bago naging kasapi ng Militia ng Bayan.
Pinipili nila na naroon lang sa kanilang barangay kaysa pumasok sa loob at mamundok.
Ginagamit sila sa pananambang sa mga sundalo at panghaharass sa mga sibilyan.
