CAUAYAN CITY – Nasawi ang 15 anyos na estudiyante matapos na mabangga ng isang 14-wheeler truck sa kahabaan ng pambansang lansangan sa barangay Caquilingan, Cordon, isabela.
Sa naging panayam ng Bombo Radyo Cauayan, sinabi ni PMaj Fernando Mallillin, hepe ng Cordon Police Station na ang biktima ay si Archie Gamilio, residente ng Anonang, Cordon, Isabela habang ang truck ay minamaneho ni Jun-jun Yadan, 39 anyos at residente ng Isidro Paredes, Diffun, Quirino.
Batay aniya sa nakakita sa aksidente na sina Edwin Sagun at Jocelyn Sambrano, mabilis ang patakbo ng binatilyo at sa palikong bahagi ng daan ay natumba siya at gumulong sa bahagi ng lane na dadaanan ng paparating na truck kaya nasagasaan.
Hindi na naiwasan ng tsuper ng truck ang biktima dahil pababa ang bahagi ng daan at may mga lulan na produkto.
Nagtamo ng malalang sugat sa katawan si Gamilio na naging sanhi ng kanyang kamatayan.
Naisugod pa rin siya sa Southern Isabela Medical Center (SIMC) sa Lunsod ng Santiago ngunit idineklarang dead on arrival ng attending physician.
Hindi naman nagtamo ng sugat sa katawan ang tsuper ng truck na si Yadan.
