CAUAYAN CITY – Gasgas sa tuhod at siko ang natamo ng isang lalaki matapos takbuhan ang mga pulis na nagsagawa ng COMELEC Checkpoint sa Maharlika Highway sa Cabaruan, Cauayan City.
Sa panayam ng Bombo Radyo kay P/ Sr. Insp. Essem Galiza ng PNP Cauayan City, hinabol ng kanilang dalawang motorsiklo at dalawang mobile patrol ang sinakyang motorsiklo ni Jerwin Camaddu, 27 anyos at residente ng Brgy. Tallungan, Reina Mercedes,Isabela.
Nagtaka ang mga pulis nang biglang takbuhan ni Camaddu sakay ng kanyang motorsiklo ang kanilang checkpoint dahil maayos naman ang kanilang pakikipag-usap sa mga naunang nasitang motorista.
Dahil dito, hinabol nila si Camaddu hanggang sa siya ay sumemplang.
Sa paliwanag ng suspek sa mga pulis, siya’y natakot lamang kaya’t nagawa niya ang tumakas.
Kumpleto naman ang papeles ng motorsiklo ni Camaddu.
