CAUAYAN CITY – Natagpuang palutang-lutang ang katawan ng isang lalaki sa ilog ng Zone 1, Research Minante 1, Cauayan City.
Ang biktima ay kinilalang si Macario Faelmoca, 84-anyos at residente ng Zone 2, Research Minante 1, Cauayan City.
Sa nakuhang impormasyon ng Bombo Radyo Cauayan, isang residente umano sa lugar ang nakakita sa palutang lutang na katawan ng biktima at agad naman umano itong humingi ng tulong sa mga residente at ipinagbigay alam sa Punong Barangay.
Nagtungo naman ang mga kapulisan sa lugar na pinangyarihan ng insidente at base sa inisyal na imbestigasyon ay wala naman umanong kahit anong sugat sa katawan ang biktima at walang nakikitang foul play sa pagkasawi nito.
Ayon kay Daniel Campos, ang nakakita sa biktima, napadaan lang umano siya sa sapa nang makita niya ang palutang lutang na katawan.
Dahil namuti ang katawan ay inakala niya itong mannequin kaya agad siyang nagtawag ng kasama upang kumpirmahin ang kanyang nakita.
Tumanggi na rin ang pamilya na isailalim sa autopsy ang labi ng biktima dahil kumbinsido sila na aksidente itong nahulog sa ilog habang tumatawid ito sa tulay na naging dahilan ng kanyang pagkakalunod.
