Isang 32-anyos na guro ang nasawi matapos masangkot sa banggaan ng minamaneho niyang motorsiklo at ng isang SUV sa isang intersection ng National Highway sa Barangay Cabugao, Echague, Isabela noong Pebrero 7.
Sa panayam ng Bombo Radyo Cauayan kay PMAJ. Domer T. Pelo, Chief of Police ng Echague Police Station, sinabi niyang base sa paunang imbestigasyon, hindi umano napansin ng guro na nagmamaneho ng motorsiklo ang paparating na SUV na mabilis ang takbo. Dahil dito, ipinasok niya ang kanyang motorsiklo sa intersection at doon naganap ang banggaan.
Agad namang rumesponde ang rescue team ng Municipal Disaster Risk Reduction and Management Office (MDRRMO) ng Echague at isinugod ang biktima sa Southern Isabela Medical Center sa Santiago City upang malapatan ng agarang lunas.
Gayunman, makalipas ang isang araw ng gamutan, noong Pebrero 8, idineklara nang patay ang biktima ng mga doktor. Ang nasawi ay itinago sa alyas na “Chris”, 32-anyos, isang guro at residente ng San Isidro, Isabela.
Ayon pa kay PMAJ. Pelo, madilim umano ang bahaging iyon ng national highway at walang streetlights, dahilan upang ituring itong accident-prone area. Dagdag niya, plano ng kanilang himpilan na makipagtulungan sa lokal na pamahalaan ng Echague upang agarang masolusyunan ang kakulangan ng streetlights sa lugar.
Samantala, sinabi naman ng drayber ng SUV na siya ay dumaraan sa national highway at hindi niya inaasahan ang biglaang paglabas ng motorsiklo, lalo na sa madilim na kondisyon ng kalsada.
Plano ring magsagawa ng pag-uusap ang mga sangkot sa insidente, kabilang ang pamilya ng biktima, upang mapag-usapan ang nangyari.
Bilang paalala, muling hinikayat ng pulisya ang lahat ng motorista na mag-ingat sa pagmamaneho, iwasan ang sobrang bilis, at maging mas mapagmatyag lalo na tuwing gabi.
