Mayroong halos dalawang buwang supply ng produktong petrolyo ang Pilipinas sa kabila ng nagpapatuloy na tensyon sa Middle East, ayon sa Bureau of Customs (BOC) nitong Linggo.
Ipinahayag ni BOC Commissioner Ariel Nepomuceno ang pahayag kasabay ng patuloy na pangamba na maaaring magtulak sa mas mataas na presyo ng gasolina sa susunod na linggo kumpara sa mga naunang pagtataya.
Ayon sa Department of Energy (DOE), ang mga minimum estimates para sa pagtaas ng presyo ng langis sa susunod na linggo ay ang mga sumusunod:
- Diesel — P19.00 kada litro
- Gasolina — P9.00 kada litro
- Kerosene — P31.00 kada litro
Sinabi ni Nepomuceno na ang BOC ay nagsasagawa ng inspeksyon sa mga warehouse at depots ng mga kompanya ng langis upang matiyak na walang artipisyal na kakulangan ng supply sa bansa.
Dagdag pa niya, pinalalakas din ng DOE ang monitoring laban sa posibleng hoarding at profiteering sa pagbebenta ng mga produktong petrolyo.
Aniya, ang krisis sa Middle East ay maaaring makaapekto rin sa koleksyon ng buwis mula sa petrolyo, kung saan kumikita ang bansa ng humigit-kumulang P330 bilyon hanggang P410 bilyon taun-taon mula sa oil taxes.
Ayon sa DOE, naghahanda na rin sila ng mga hakbang upang mapagaan ang epekto ng tensyon sa Middle East sa supply at presyo ng langis sa bansa.
