Puspusan ang isinasagawang simultaneous fire drill ng Bureau of Fire Protection (BFP) sa lungsod bilang bahagi ng paghahanda at pagpapalakas ng kaalaman ng publiko sa tamang pagresponde sa sunog, lalo na ngayong panahon ng tag-init kung kailan mataas ang insidente ng sunog.
Sa panayam ng Bombo Radyo Cauayan kay FCInsp Roger Esteban, City Fire Marshal, sinabi niya na mas pinaigting nila ang pagsasagawa ng fire drill sa iba’t ibang lugar upang matiyak ang kahandaan ng mga mamamayan sakaling magkaroon ng emerhensiya. Aniya, mahalagang magkaroon ng sapat na kaalaman at disiplina ang bawat isa pagdating sa paglikas at pag-iwas sa sunog.
Kamakailan lamang ay nagsagawa ang BFP ng fire drill sa isang malaking bangko sa lungsod, kung saan aktibong nakilahok ang mga empleyado at kliyente sa isinagawang simulation. Layunin nito na masanay ang mga ito sa tamang proseso ng paglikas at agarang pagtugon sa mga ganitong insidente.
Bukod dito, sunod-sunod din ang isinagawang fire drill sa mga elementarya at high school na paaralan sa lungsod. Tinututukan ng BFP ang mga eskwelahan upang matiyak ang kaligtasan ng mga mag-aaral at guro, lalo na sa oras ng sakuna.
Kasabay nito, nagsagawa rin ang BFP ng fire safety inspection sa iba’t ibang paaralan upang matiyak na sumusunod ang mga ito sa itinakdang pamantayan sa kaligtasan. Sinuri ang mga fire exit, fire extinguisher, at iba pang kagamitan na mahalaga sa pagresponde sa sunog.
Binigyang-diin ni Esteban na ang ganitong mga aktibidad ay hindi lamang para sa compliance kundi para sa aktwal na kaligtasan ng bawat isa.
Patuloy naman ang panawagan ng BFP sa publiko na maging mapagmatyag at makiisa sa mga programang pangkaligtasan upang maiwasan ang pinsalang dulot ng sunog.
