Tiniyak ni Senador Panfilo Lacson na tuloy-tuloy at walang paghinto ang kanyang imbestigasyon sa mga umano’y maanomalyang infrastructure project sa Taguig City, kasabay ng pangangalap ng karagdagang ebidensiya at mga testigo kaugnay ng usapin.
Sa pahayag ng senador nitong Sabado, sinabi niyang patuloy nilang sinusundan ang mga impormasyong natatanggap upang mapanatili ang momentum ng imbestigasyon sa mga umano’y kuwestiyonableng slope protection at drainage projects sa lungsod.
Ayon kay Lacson, hindi nila hahayaan na mabalam ang imbestigasyon dahil layunin nilang matukoy ang buong katotohanan at maihatid ito sa lohikal na konklusyon.
Nag-ugat ang pagsisiyasat matapos ang naging palitan ng akusasyon nina Lacson at Senador Alan Peter Cayetano. Nauna nang inihayag ni Lacson na sisiyasatin niya ang ilang proyekto sa Taguig, na kilalang political bailiwick ni Cayetano, matapos siyang akusahan ng kapwa senador na umano’y dumoble ang kanyang net worth habang nasa Senado.
Bukod sa mga umano’y maanomalyang proyekto, inakusahan din ni Lacson si Cayetano na nakapagpasok umano ng budget insertions na umaabot sa ₱6.79 bilyon.
Iginiit din ni Lacson na may ilang proyekto sa Taguig na hindi umano natapos sa kabila ng pondong inilaan para sa mga ito.
Sa isa pang pahayag, sinabi ng senador na patuloy siyang nag-iipon ng sapat na mga testigo at dokumentaryong ebidensiya na maaaring magsilbing basehan ng mga posibleng kasong isasampa laban kay Cayetano.
Sa ngayon, wala pang opisyal na tugon si Senador Cayetano kaugnay sa pinakahuling mga alegasyon at pahayag ni Lacson.
