Kanselado ang nakatakdang impeachment trial ni Vice President Sara Duterte at ang sesyon ng Senado ngayong araw ng Martes, Agosto 18, dahil sa inaasahang malalakas na pag-ulan at pagbaha dulot ng Southwest Monsoon o Habagat.
Sa abisong inilabas ni Senate Secretariat at Impeachment Court Clerk Renato Bantug Jr., sinabi na ipinag-utos ni Presiding Officer Senador Francis “Chiz” Escudero ang pagkansela ng pagdinig ng impeachment court bilang pag-iingat sa inaasahang masamang panahon.
Ayon sa abiso, isinasaalang-alang ng impeachment court ang forecast ng matinding pag-ulan at posibleng pagbaha sa ilang bahagi ng bansa dulot ng umiiral na Habagat.
Ito na ang ikalawang pagkakataon na naantala ang impeachment trial dahil sa masamang panahon, matapos ding ipagpaliban ang isang pagdinig noong Agosto 10.
Kasabay nito, pinayagan din ni Senate President Sherwin Gatchalian ang mga opisyal at empleyado ng Senado na mag-work from home ngayong araw dahil sa masamang lagay ng panahon.
Dahil sa suspensyon, hindi ipagpapatuloy ang direct examination ng House prosecution kay Gina Acosta, dating special disbursing officer ng Office of the Vice President, na isa sa mga pangunahing testigo sa paglilitis.
Nauna nang naglabas ang Malacañang ng memorandum na nag-uutos sa mga tanggapan ng pamahalaan sa Metro Manila at ilang karatig-lalawigan na magpatupad ng alternative work arrangements kasabay ng pagsuspinde ng face-to-face classes dahil sa epekto ng Habagat.
