Napabilang ang aktres na si Liza Soberano sa mga hurado para sa Golden Globes Impact Prize for Documentary ng Artemis Rising Foundation sa 83rd Venice Film Festival.
Ayon sa Variety, tutulong si Soberano sa pagpili ng isang documentary feature sa official selection ng festival na tumatalakay sa mahahalagang isyung panlipunan sa pamamagitan ng makabuluhang pagkukuwento.
Makakasama niya sa jury sina Golden Globes President Helen Hoehne, Oscar-winning producers Regina K. Scully at Geralyn White Dreyfous, at Think-Film Impact Production founder Danielle Turkson Wilson.
Ang mananalong documentary ay tatanggap ng 10-thousand-dollar cash prize mula sa Artemis Rising Foundation.
Sinabi ni Soberano na isang karangalan para sa kanya ang maging bahagi ng jury at kilalanin ang mga documentary filmmaker na gumagawa ng matapang at makabuluhang kuwento.
Samantala, kasalukuyang nasa Pilipinas si Soberano para i-promote ang “Forgotten Island,” isang paparating na DreamWorks Animation film kung saan kabilang siya sa voice cast.
