Nagbabala si Ombudsman Jesus Crispin Remulla sa umano’y mga pang-aabuso sa loob ng Bureau of Internal Revenue (BIR), kasunod ng mga reklamong natanggap mula sa ilang lider ng negosyo hinggil sa pangongolekta ng buwis at pagproseso ng mga permit.
Sa isang panayam, sinabi ni Remulla na kabilang sa mga pangunahing problemang kinakaharap ng mga negosyante ang umano’y hindi wastong gawain ng ilang tauhan ng BIR.
Ibinahagi rin ng Ombudsman ang alegasyon ng tinatawag na 70-30 na hatian, kung saan 70 porsiyento umano ang napupunta sa mga tauhan ng BIR at 30 porsiyento lamang sa pamahalaan.
Gayunman, hindi na nagbigay ng karagdagang detalye si Remulla hinggil sa naturang alegasyon.
Ibinunyag din niya ang mga posibleng pang-aabuso sa paggamit ng Letters of Authority (LOA), na ginagamit ng BIR sa pagsasagawa ng tax audits o pagsusuri sa mga buwis ng mga negosyo.
Matatandaang sinuspinde ng BIR noong Nobyembre 2025 ang pag-iisyu ng mga LOA matapos lumutang ang mga alegasyong ginagamit ang mga ito sa mga ilegal na pagkakakitaan. Bumuo rin noon ng technical working group upang repasuhin at baguhin ang sistema.
Samantala, hinihingan na ng panig ng BIR ng pahayag kaugnay sa mga alegasyon ni Remulla.
