Isang aklat na hiniram mula sa isang pampublikong aklatan sa Australia mahigit 150 taon na ang nakalipas ang muling naibalik matapos itong matagpuan sa loob ng isang lumang fireplace habang isinasailalim sa renovation ang isang bahay.
Ayon sa Kiama Library sa New South Wales, natagpuan ng isang pamilya ang aklat na nakatago sa isang tea desk na nakapader sa loob ng fireplace ng kanilang tahanan at agad nila itong isinauli sa aklatan noong nakaraang linggo.
Ang aklat na may pamagat na The Antiquities of Athens ay inilathala noong 1858 at kabilang sa koleksiyon ng Kiama Public Library noong ito ay nakabase pa sa dating Kiama School of Arts mula 1872 hanggang 1890.
Hindi na matukoy ang eksaktong petsa kung kailan ito hiniram, ngunit tinatayang nasa humigit-kumulang 150 taon na ang nakalipas. Kung ipatutupad ang dating patakaran ng aklatan, aabot umano sa halos 20,000 dolyar ang multa nito dahil sa sobrang tagal na pagkakahiram.
Sa kabila nito, sinabi ng aklatan na wala na silang ipinapataw na overdue fines sa kasalukuyan. Ang aklat, na inilarawang nasa “kapansin-pansing magandang kondisyon,” ay hindi na muling ipapahiram kundi ilalagay bilang bahagi ng koleksiyon ng mahahalagang kasaysayang bagay ng aklatan.
