Muling sasabak sa aksyon ang Filipina tennis star na si Alex Eala sa Cincinnati Open kung saan makakatapat niya ang Romanian na si Elena-Gabriela Ruse sa Round of 64 ng torneo.
Bilang kasalukuyang World No. 20, nakatanggap si Eala ng first-round bye at diretsong umabante sa ikalawang round ng kompetisyon.
Dala ni Eala ang mataas na kumpiyansa matapos masungkit ang kanyang kauna-unahang WTA singles title sa DC Open, na sinundan pa ng pag-abot niya sa Round of 16 ng Canadian Open.
Samantala, si Ruse ay kasalukuyang nasa ika-77 puwesto sa world rankings at minsang umabot sa career-high ranking na No. 51 noong 2022.
Ito ang ikalawang paghaharap nina Eala at Ruse. Una silang nagharap sa 2024 US Open qualifying tournament kung saan nanaig ang Romanian matapos ang tatlong set na laban.
Hangad ngayon ni Eala na maipagpatuloy ang kanyang magandang kampanya sa professional circuit at makapag-uwi ng panibagong tagumpay sa isa sa mga prestihiyosong torneo sa Estados Unidos.
